ସିନ୍ଦୂର ଯେତେବେଳେ ବାରୁଦର ରୂପ ନିଏ ଏହାର ପରିଣାମ କଣ, ତାହାକୁ ଦେଖିଲା ସାରା ବିଶ୍ୱ। ରକ୍ତ ନୁହେଁ, ପ୍ରତି ଶିରାରେ ବୋହୁଛି ଗରମ ସିନ୍ଦୂର। ୨୨ ଏପ୍ରିଲର ଜବାବ ୨୨ ମିନିଟ୍ରେ ଦେଲୁ। ରାଜସ୍ଥାନର ବିକାନେରରୁ ପାକିସ୍ତାନକୁ କଡ଼ା ସନ୍ଦେଶ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ରାଜସ୍ଥାନର ବିକାନେରରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଅପରେସନ ସିନ୍ଦୁର ପରେ ଏହା ତାଙ୍କର ପ୍ରଥମ ରାଜସ୍ଥାନ ଗସ୍ତ। ଏହି ସମୟରେ ସେ ‘ଅମୃତ ଭାରତ ଷ୍ଟେସନ ଯୋଜନା’ ଅଧୀନରେ ନବନିର୍ମିତ ଦେଶନୋକ ରେଳ ଷ୍ଟେସନର ଉଦଘାଟନ କରିଥିଲେ। ସେ ୧୮ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ୮୬ଟି ଜିଲ୍ଲାରେ ନିର୍ମିତ ୧୦୩ଟି ଅମୃତ ରେଳ ଷ୍ଟେସନକୁ ଉଦଘାଟନ କରିଥିଲେ।
ଏହି ଅବସରରେ ପାକିସ୍ତାନକୁ କଡ଼ା ସନ୍ଦେଶ ଦେଇଛନ୍ତି ମୋଦୀ। କହିଥିଲେ ଯେ ଆତଙ୍କବାଦୀମାନେ ଆମ ଭଉଣୀମାନଙ୍କ ଧର୍ମ ବିଷୟରେ ପଚାରି ସେମାନଙ୍କ ସିନ୍ଦୁର ନଷ୍ଟ କଲେ। ପହଲଗାମରେ ସେହି ଗୁଳି ଫୁଟିଥିଲା କିନ୍ତୁ ସେହି ଗୁଳିଗୁଡ଼ିକ ୧୪୦ କୋଟି ଦେଶବାସୀଙ୍କ ହୃଦୟକୁ ବିଦ୍ଧ କରିଥିଲା। ଆମେ ସେମାନଙ୍କୁ କଳ୍ପନାଠାରୁ ମଧ୍ୟ ବଡ଼ ଦଣ୍ଡ ଦେବାକୁ ସଂକଳ୍ପ ନେଇଥିଲୁ। ଆଜି, ଆପଣମାନଙ୍କ ଆଶୀର୍ବାଦ ଏବଂ ଦେଶର ସେନାର ସାହସିକତା ସହିତ, ଆମେ ସମସ୍ତେ ଏହାକୁ ପୂରଣ କରିପାରିଛୁ।
ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଆମ ସରକାର ସେନାକୁ ମୁକ୍ତ ହାତ ଦେଇଥିଲା ଏବଂ ତିନି ସେନା ମିଶି ଏପରି ଚକ୍ରବ୍ୟୁହ ସୃଷ୍ଟି କରିଥିଲେ ଯେ ପାକିସ୍ତାନକୁ ଆଣ୍ଠୁ ମାଡ଼ି ବସିବାକୁ ବାଧ୍ୟ କରାଯାଇଥିଲା। ୨୨ ତାରିଖରେ ହୋଇଥିବା ଆକ୍ରମଣର ଜବାବରେ, ଆମେ ୨୨ ମିନିଟ୍ ମଧ୍ୟରେ ଆତଙ୍କବାଦୀଙ୍କ ନଅଟି ସବୁଠାରୁ ବଡ଼ ଆଡ୍ଡାକୁ ଧ୍ୱଂସ କରିଦେଇଥିଲୁ।
ଯେଉଁମାନେ ସିନ୍ଦୁର ପୋଛିବାକୁ ବାହାରିଥିଲେ ସେମାନେ ଧୂଳିରେ ପରିଣତ ହୋଇଗଲେ। ଯେଉଁମାନେ ଭାବୁଥିଲେ ଯେ ଭାରତ ଚୁପ୍ ରହିବ, ଯେଉଁମାନେ ନିଜ ଅସ୍ତ୍ରଶସ୍ତ୍ର ଉପରେ ଗର୍ବ କରୁଥିଲେ, ସେମାନେ ଆଜି ଧ୍ୱଂସାବଶେଷ ଗଦା ତଳେ ପୋତି ହୋଇଯାଇଛନ୍ତି। ଏହା ପ୍ରତିଶୋଧ ନୁହେଁ, ଏହା ନ୍ୟାୟର ଏକ ନୂତନ ରୂପ। ଏହା ହେଉଛି ଅପରେସନ ସିନ୍ଦୂର।
